Nestes días cúmprese o primeiro aniversario do inicio dos peores lumes que xamais se viron en Galicia. Hectáreas e hectáreas de montearderon na nosa terra, mentres todo o mundo asistía incrédulo, sen crer o que víamos, como se ía consumindo parte da nosa natureza, e de nós mesmos, porque non dicilo. Foi un dos maiores desastres ecolóxicos que nos tocou vivir.

Este ano, polo de agora, estamos libres. Parece que o xullo tan fresco e chuvioso que tivemos seguro que axudará a que este agosto non arda o monte, ou polo menos non tanto. Pero bueno, como hai moito desaprensivo e cada vez é máis doado provocar un incendio (agora hai unhas pastillas para facer lume que lles aforran moito traballo a estes delicuentes), agardo que desde a Consellería de Medio Rural da Xunta de Galicia se fixeran ben os deberes, se aprendera dos erros do ano pasado e se mellorase o servizo galego contraincendios. Este ano foi ano de eleccións locais, agardo tamén que os políticos municipais se puxeran as pilas rápido e amañaron os temas dos equipos contraincendios de cada concello, ou que os anteriores os deixaran xa máis ou menos amañados. Tamén espero que algún partido non volva a xogar con esa estratexia errada de dilación no tempo, para perxudicar aos partidos do goberno. Realmente e á fin, para perxudicarnos a todos. Agárdoo de veras, porque será en beneficios de todos.

Pero hoxe hai outra Galicia que está sufrindo. A que noutrora se chamou Galicia canaria está ardendo estes días. O ano pasado na miña visita á illa de Gran Canaria tiven a sorte (aínda que pasei un pouco de medo no coche) de visitar a zona e é unha auténtica traxedia, para os grancanarios. Estalles ardendo a única zona verde que teñen en toda a illa, o seu pulmón, os seus únicos pinos canarios. Confiemos na rápida recuperación que ten este tipo de pinoe que todo o entorno que comanda o Roque Nublo, se recupere o máis pronto posible. Eran e son unhas paraxes increíbles.

Desde Magazos, cada vez máis moreno dun sol que parece que en todos os medios de comunicación nos queren negar (se chegan a dar hoxe bo tempo, morremos todos na praia de calor), despídome preocupado polos lumes en Gran Canaria e en Italia, que están devastando todo o centro e sur da península itálica.

Un saúdo.